اسلام آباد۔28 جنوری(اے پی پی)وزیراعظم عمران خان آکھیے ڄݙاں جرائم پیشہ لوک اقتدار اچ آسن تاں ملک کیویں ترقی کریسی، اپݨیاں صلاحیتاں تے اعتماد کرݨا ہوسی، ملکی نظام ٹھیک کرݨ اچ ویلھا لڳسی،احساس کمتری توں ٻاھرو آوݨا ہوسی،جیکر لوکاں کوں پراݨیاں عاتاں پئے ونڄن تاں ول سسٹم وٹاوݨ اچ ویلھا لڳدے۔ اے ڳالھ انہاں اسلام آباد اچ ہک تقریب نال خطاب اچ آکھی۔ انہاں آکھیا جو بھارت کہیں وی شعبے اچ ساݙے توں اڳو کائنی، ساکوں اپݨے بے شمار سائل توں فیدہ چاوݨا ہوسی، ساکوں ہک خود دار پاکستان دی سوچ کون ودھاوݨا چاہیدے، پاکستان دا نائن الیون نال کوئی تعلق کائنی، پاکستان ٻنھاں دی جنگ اچ رل تے غلطی کیتی ہئی۔ انہاں آکھیا جو ساݙے دور اچ ملک قرضاں اچ 11 ہزار ارب ودھارا تھئے جیندے اچ سابقہ حکومتاں کیتے قرض تے سود دی مد اچ 6 ہزار ارب روپے ادا کیتن، ڈالر دا ملھ ودھݨ نال قرض اچ 3 ہزار ارب دا ودھو ٻھار پئے، کرونا وی ملکی معیشت تے اثرات پاتن، پاݨی پاکستان دا وݙا مسلہ اے، ملک دی ترقی کیتے شارٹ دی بڄائے طویل المدت منصوبے ݙیوݨ دی لوڑھ اے، اڄ پنڄھاہ سال بعد پاکستان اچ ݙو وݙے ڈیمز بݨدے پین، ملک اچ بدقسمتی نال الیکشن دی پلاننگ تاں تھئی اے بھل ڈیم بݨاوݨ دی نئیں، توانائی معاہداں اچ کرپشن اتے آندے الیکشن دی سوچ شامل ہئی، پچھلیاں حکومتاں بجلی دے اینڄھے مہانگے معاہدے کیتن جو بجلی بھاویں نہ کرو ایندی کیپسٹی پیمنٹ لازمی کرݨی پوندی اے۔
