اسلام آباد۔29اکتوبر(اے پی پی) صدر مملکت ڈاکٹر عارف علوی جمہوریہ ترکیہ دی 100 ویں سالگرہ دے موقع تے پاکستانی عوام اتے حکومت دی طرفوں ترکیہ دے صدر اتے عوام کوں مبارخ ݙتی اے ۔ اتوار کوں آپݨے ھک ویڈیو سنھیے اچ انہاں آکھیے میں صدر رجب طیب اردوان کوں جمہوریہ ترکیہ دی 100 ویں سالگرہ دے پرمسرت موقع تے دلوں مبارخ ݙینداں ۔ انہاں آکھیے 29 اکتوبر 1923 کوں عظیم رہنما مصطفیٰ کمال اتاترک دی کرشماتی قیادت اچ جمہوریہ ترکیہ دا قیام عمل اچ آیا ہئی۔ صدر مملکت آکھیے پاکستان اتے ترکیہ دے تعلقات ٻہوں پراݨے ہن ، پاکستان تے ترکیہ دے قیام توں پہلے وی ایں خطے دے لوکاں تے ترک عوام دی عظیم یاری ہئی ۔ انہاں ایں ڳالھ تے روشنی پاتی جو ݙوہیں ملکاں دے چنڳے تعلقات دا اندازہ ایں ڳالھ توں وی تھیندے جو ایں خطے توں روسی جنگ اچ لڑݨ کیتے امدادی سامان دے نال نال افرادی قوت کوں وی بھیڄا ڳیا ہئی جیں دا ترکی ہمیشہ مثبت جواب ݙتے ۔ صدر مملکت مزید آکھیے رجب طیب اردوان دی قیادت اچ ترکیہ زبردست پیشرفت کیتی اے تے ایندے نال نال موجودہ ترک قیادت مسلم دنیا دے مسئلیں کوں مکاوݨ اچ وی شاندار قیادت دا مظاہرہ کیتے۔
