اسلام آباد۔7اپریل(اے پی پی) وزیراعظم شہباز شریف دی اڳواݨی اچ قومی سلامتی کمیٹی دا 41 واں اجلاس تھئے جیندے اچ دہشتگردی دے خلاف جاری آپریشن ٻیا تیکھا کرݨ اتے قومی سلامتی تے کوئی وی سمجھوتہ نہ کرݨ دا عزم دوہرایا ڳئے۔ اجلاس اچ چیئرمین جوائنٹ چیفس آف سٹاف کمیٹی سودھا تریے مسلح افواج دے سربراہان، اطلاعات، دفاع، خزانہ، خارجہ اتے وزارت داخلہ دے وزرا شریک تھین۔ اجلاس اچ ڈی جی آئی ایس آئی، ڈی جی آئی بی، ڈی جی ایم آئی اتے ڈی جی ایم او سودھا ٻئے عسکری و سویلین حکام وی شریک تھین۔ ایں موقع تے کمیٹی ممبران اتے چارےں صوبیاں دے وزرائے اعلیٰ وی موجود ہن۔ اجلاس اچ حساس اداریاں دے سربراہان قومی سلامتی اتے سکیورٹی ڄݙاں جو متعلقہ وزارتاں دے سیکرٹریز فنڈز دی دستیابی اتے ٻئے معاملیاں تے بریفنگ ݙتی۔ اجلاس ملک دے مختلف حصیاں اچ دہشتگردی دی ودھدی لہر تے چنتا کریندے شرپسندی دے خلاف کارروائیاں تے اطمینان کیتے اتے دہشتگردی اچ شہید تھیوݨ آلیاں دی قربانی کوں خراج عقیدت پیش کیتا ڳیا۔ شرکا بلوچستان اچ کالعدم تنظیم دے سربراہ دی گرفتاری تے سیکیورٹی اداراں دی کامیابی تے خراج تحسین پیش کریندے آکھیا جو سکیورٹی اداریاں دے افسراں اتے جواناں دی قربانیاں دہشتگردی دے کلاف نا ونڄیسن۔ کمیٹی انسداد دہشتگردی آپریشنز جاری رکھݨ تے اتفاق کیتے، وزیر خزانہ اسحاق ڈار معاشی صورتحال تے تفصیلی بریفنگ ݙیندے آئی ایم ایف نال مذاکرات، دوست ملکاں نال معاملات دا ݙسایا۔ کمیٹی اہم قومی معاملیاں تے کہیں دبائ اچ نا آندے ہوئے ملکی اندرونی و بیرونی سلامتی تے کوئی سمجھوتہ نا کرݨ دا عزم کیتا۔
