اسلام آباد۔25نومبر (اے پی پی) وزیر خارجہ بلاول بھٹو زرداری ماحول دا ضیان کرݨ آلے ایندھن دے استعمال کوں ختم کرݨ کیتے عملی اتفاق رائے دی لوڑھ تے زور ݙیندیں ہوئیں آکھیا جو کوپ 27 اچ موسمیاتی تبدیلی بارے اہم معاہدہ اتے ”ڈیمیج اینڈ لاس” فنڈ دا قیام وݙی کامیابی اے۔ موسمیاتی تبدیلیاں نال نبڑݨ کیتے کلائیمنٹ بینک ٻݨایا ونڄے تانجو ترقی پذٰیر ملکاں کوں مناسب شرح تے قرضے ملن۔ پاکستان اچ اڄوکے چھل پاروں وݙی تباہی تھئی اے۔ اے ڳالھیں انہاں غیرملکی نشریاتی ادارے کوں انٹرویواچ آکھی۔ انہاں آکھیا جو کوپ 27 اچ موسمیاتی تبدیلی بارے اہم معاہدہ کہیں ہک ملک نی، پوری دنیا دی جت اے، معاہدہ انہاں لوکاں دی جت اے جیڑھے موسمیاتی تبدیلی پاروں متاثر تھیندے پن۔ وزیرخارجہ آکھیا جو مالی تعاون دا معاملہ کوپ دے آندے اجلاس تئیں پورا تھیوݨ دا امکان اے جئیں دی میزبانی متحدہ عرب امارات کریسی۔ وزیر خارجہ آکھیا جو اساں اپݨے لوکاں کوں ولا پیراں تے کھڑا کرݨے، ماحول دا ضیان کرݨ آلے ایندھن دے استعمال کوں ختم کرݨ کیتے عالمی ڳٹھ جوڑ دی لوڑھ اے۔
