اسلام آباد۔31دسمبر(اے پی پی) سال 2022 اچ قومی اسمبلی اچ 47 سرکاری ٻل اتے 15 پرائیویٹ ممبر ٻل منظور کیتے ڳئن، جنہاں اچوں 38 ٻل ایکٹ آف پارلیمنٹ بݨ چکن ، سال 2022 کوں پارلیمانی تاریخ اچ یاد رکھیا ویسی کیوں جو پارلیمنٹ دی تاریخ اچ پہلی واری معاشرے دے پسماندہ طبقیں توں تعلق رکھݨ آلیاں تریمتاں تے ، ٻالاں ، اقلیتی برادری اتے خواجہ سرا کیتے قومی اسمبلی دے دروازے ترائے ݙینھ کیتے کھولیے ڳے ،سپیکر قومی اسمبلی راجہ پرویز اشرف دی ہدایت تے ایوان دی ڈائمنڈ جوبلی منائی ڳئی اتے ایندے اچ ڈائمنڈ جوبلی دی مناسبت نال خصوصی تقریبات دا منعقد کیتیاں ڳیاں جیں اچ معاشرے دے سارے طبقیں شرکت کیتی ۔ قومی اسمبلی سیکرٹریٹ دی طرفوں جاری بیان موجب اسپیکر قومی اسمبلی دی خصوصی توجہ پاروں ٻالاں دے حقوق دے تحفظ کیتے پہلا پارلیمانی کاکس تشکیل ݙتا ڳیا۔سال 2022 اچ موسمیاتی تبدیلیاں دے چیلنجز کوں چاوݨ اچ پارلیمانی سفارتکاری اہم کردارنبھائے ۔قومی اسمبلی موسمیاتی انصاف دے مقدمے کوں چاوݨ کیتے ایشیا پیسیفک ریجن دے ممبر ملکاں تے مشتمل آئی پی یو سیمینار منعقد کرایا ڳیا تے آئی پی یو دی جنرل اسمبلی اچ موسمیاتی تبدیلیاں پاروں متاثر تھیوݨ آلے ترقی پزیر ملکاں کیتے ہنگامی فنڈ دے قیام کیتے قرارداد پیش کیتی ڳئی جیں دے بعد کوپ 27 کانفرنس اچ لاس اینڈ ڈیمجز فنڈ دا قیام عمل اچ گھن آیا ڳیا جیڑھا جو قومی اسمبلی دی کامیاب پارلیمانی سفارتکاری دا عکاس اے۔ ایں توں انڄ 2022 قانون سازی دے اعتبار توں ھک تاریخی اہمیت دا حامل سال رہیا ایں سال اچ عوام دی فلاح و بہبود کیتے ریکارڈ قانون سازی کیتی ڳئی ۔سال 2022 اچ قومی اسمبلی دے سوشل میڈیا کوں عوام تے انہاں دے نمائندیں وچال خلا کوں پر کرݨ کیتے فعال بݨایا ڳیا ۔ قومی اسمبلی دے ایوان سال 2022 اچ قانون سازی دے شعبے اچ غیر معمولی کارکردگی دا مظاہرہ کیتا ۔ جنوری 2022 توں دسمبر 2022 تئیں قومی اسمبلی اچ 47 سرکاری ٻل تے 15 پرائیویٹ ممبر ٻل منظور کیتے ڳئن جنہاں اچوں 38 ٻل ایکٹ آف پارلیمنٹ بݨ چکن ۔ قومی اسمبلی دی طرفوں نمایاں قانون سازی کیتی ڳئی انہاں اچ الیکشن ٻل، رحمت العالمین اتھارٹی ٻل، نیشنل ہائی وے سیفٹی ٻل، پاکستان میڈیکل اینڈ ڈینٹل کونسل ٻل، کرمنل لا (ترمیمی) ٻل، پاکستان ایکسپورٹ اینڈ امپورٹ ٻل، قومی احتساب (ݙوجھا ترمیمی) ٻل، پاکستان ٹوبیکو ٻل، اینٹی ڈمپنگ ڈیوٹیز ٻل، کیپٹل ڈویلپمنٹ اتھارٹی ٻل، پٹرولیم ٻل، غیر ملکی سرمایہ کاری اتے اسلام آباد اچ بلدیاتی انتخابات ٻل شامل ہن ۔سال 2022 اچ مختلف امور تے ایوان اچ 25 قرارداداں منظور کیتیاں ڳیاں ۔ایں توں علاوہ قومی اسمبلی سیکرٹریٹ کوں ارکان دی طرفوں 3751 سوال ملیے جنہاں اچوں 1004 سوالاں دے جواب ݙتے ڳئن ۔ سال 2022 اچ کل 183 توجہ کراؤ نوٹس ملیے جنہاں اچوں 71 ایوان اچ پیش کیتے ڳن تے 43 تے بحث تھئی ۔ سال 2022 اچ مجموعی طور تے 82 استحقاق دیاں تحریکاں ملیان جنہاں اچوں 45 متعلقہ کمیٹی کوں بھیج ݙتیاں ڳیان ۔ ایں توں انڄ ، 2007 دے قواعد و ضوابط دے قاعدہ 259 دے تحت 124 تحاریک ملیاں جنہاں اچوں 32 ایوان اچ پیش کیتیاں ڳئن ۔
