اسلام آباد۔25اپریل(اے پی پی) عدالت عظمی اچ عیدالفطر دیاں چھٹیاں توں بعد کل(ٻدھ )توں شروع تھیوݨ آلے عدالتی ہفتے اچ 5 بینچز مختلف کیسز دی سماعت کریسن ۔چیف جسٹس 26 توں 28 اپریل تئیں ھک سپیشل اتے 5 ریگولر بینچز تشکیل ݙتن ، جسٹس عمر عطا بندیال دی سربراہی اچ سپیشل بینچ اچ جسٹس اعجاز الااحسن، جسٹس منیب اختر شامل ہن۔بینچ نمبر ھک اچ چیف جسٹس عمر عطا بندیال، جسٹس جمال خان مندوخیل، جسٹس اطہر من اللہ، بینچ نمبر ݙو اچ جسٹس سردار طارق مسعود اتے جسٹس شاہد وحید، ترائے نمبر بینچ اچ جسٹس اعجاز الاحسن اتے جسٹس امین الدین خان، چار نمبر بینچ اچ جسٹس منصور علی شاہ اتے جسٹس عائشہ ملک، پنج نمبر بینچ اچ جسٹس منیب اختر اتے جسٹس سید مظاہر علی اکبر شامل ہوسن ۔پورے ملک اچ ھکے ویلھے عام انتخابات کراوݨ کیتے درخواستاں تے 27 اپریل کوں چیف جسٹس عمر عطا بندیال دی سربراہی اچ 3 رکنی خصوصی بینچ سماعت کریسی ، اقلیتی برادری دے حقوق دے تحفظ کیتے ڳھدے ونڄݨ آلے از خود نوٹس تے وی سماعت تھیسی ۔بھونگ مندر رحیم یار خان تے حملہ ازخود نوٹس کیس دی سماعت جسٹس اعجاز الاحسن دی سربراہی اچ ݙو رکنی بینچ 27 اپریل کوں کریسی ، بھوجا ائیر لائن اسلام آباد طیارہ حادثہ متعلق کیس جسٹس منیب اختر دی سربراہی اچ 2 رکنی بینچ 27 اپریل کوں سݨسی ۔
