اسلام آباد۔21نومبر(اے پی پی) وفاقی وزیرداخلہ محسن نقوی نال برطانوی نائب وزیر خارجہ پاکستان و افغانستان ہمیش فالکنر ملاقات کیتی۔ جیں اچ سانجھی دلچسپی دے امورتے پاک برطانیہ تعلقات تے ڳالھ مہاڑ کیتی ڳئی ۔ ملاقات اچ ݙو پاسے تعلقات دے ودھارے سانڳے سانجھے اقدامت تے وی ڳالھ مہاڑ کیتی ڳئی وفاقی وزیرداخلہ محسن نقوی برطانیہ دے نائب وزیر خارجہ ہمیش فالکنر سانڳے نیک خواہشات دااظہار کیتے۔ وزیر داخلہ پاک برطانیہ تعلقات مزید مستحکم بݨاوݨ دا عزم کیتے ۔ ملاقات اچ پاکستان تے برطانیہ وچال وسیع تر ݙوطرفہ و علاقائی امور تے مضبوط ہم آہنگی دی لوڑھ تے زور ݙتا ڳئے۔وفاقی وزیرداخلہ محسن نقوی آکھیے برطانیہ پاکستان دا بہترین یار ملک اے ، ویلھا آڳئے جو سانجھے تعاون کوں پائیدار اقتصادی پارٹنر شپ اچ بدالیا ونڄے ۔ آپ دے دورہ پاکستان نال ݙوپاسے تعلقات اچ مزید گرم جوشی آسی۔ وفاقی وزیرداخلہ محسن نقوی ایں ڳالھ تے زور ݙتے جو سوشل میڈیا تے بے بنیاد اتے گمراہ کن افواہیں کھنڈاوݨ تے پروپیگنڈا کرݨ دے خلاف سانجھے اقدامات چاوݨ دی لوڑھ اے ۔ وفاقی وزیر داخلہ آکھئے جو پاکستان اچ اقلیتاں کوں سارے حقوق ملدے پئن ، اقلیتی برادریاں دا تحفظ ساݙی اولین ترجیح اے۔برطانوی ہائی کمشنر جین میریٹ اتے برطانیہ اچ پاکستان دے ہائی کمشنر ڈاکٹر محمد فیصل وی ایں موقع تے موجود ہن۔
