اسلام آباد۔8ستمبر(اے پی پی) وفاقی وزیر تعلیم و پیشہ وارانہ تربیت مدد علی سندھی آکھیے آؤ رل تے عزم کروں اساں آپݨیاں کمیاں کوں نظر انداز نہ کریسوں، کمیاں کوں ہٹا تے امید دی شمع روشن کریسوں ، تھوڑے ویلھے اچ ایجھا کم کریسوں جو او مثال بݨ ونڄے ، جیڑھے ݙیکھدے پئن ، محسوس کریندے پئن اوہے ڳالھیں کریسن ، ہݨ تئیں 3کروڑ ٻال سکولاں توں ٻہر کیوں ہن، ٻالاں تعلیمی نیٹ ورک اچ شامل کرݨ سانڳے 10-12سال دا پلان تشکیل ݙیوݨ دی لوڑھ اے ۔اے ڳالھ انہاں علامہ اقبال اوپن یونیورسٹی اچ عالمی خواندگی دے ݙینھ تے منعقدہ سیمینار توں خطاب کریندے ہوئیں آکھی اے ۔ مدد علی سندھی آکھیے میں علامہ اقبال اوپن یونیورسٹی دی تعلیمی خدمات توں چنڳی طرح واقف ہاں تے ایں یونیورسٹی دی پورے ملک اچ خدمات توں مطمئن ہاں۔انہاں عالمی خواندگی دے ݙینھ تے سیمینار کراوݨ تے یونیورسٹی دے وائس چانسلر پروفیسر ڈاکٹر ناصر محمود کوں مبارخ ݙتی ۔علامہ اقبال اوپن یونیورسٹی دے وائس چانسلر پروفیسر ڈاکٹرناصر محمود آکھیے پاکستان اپݨی آزادی دے 76سال گزاریے لیکن اڄ وی اساں کنے ترائے کروڑ ٻال سکولاں توں ٻہر کیوں ہن جنہاں کوں اساں سکول پڄاوݨاں ہئی لیکن نی پڄا سڳیے ۔ انہاں ٻالاں کوں سکول گھن آوݨ کیتے لمبی مدت منصوبے دی لوڑھ اے ، ہر حکومت دی کوشش ہوندی اے جو او آپݨے دور اچ اِنہاں ٻالاں کوں سکول اچ داخل کراون تاں جو او کریڈٹ گھن سڳن، اے تمغے دی نی فرض دی ڳالھ اے جیڑھا چار پنج سال اچ ممکن کائنی ،انہاں ٻالاں کوں تعلیمی نیٹ ورک اچ رلاوݨ کیتے 10-12سال دا پلان تشکیل ݙیوݨ دی لوڑھ اے ۔ ڈاکٹر ناصر مزید آکھیے خواندگی کوں ناپݨ اتے خواندگی دی تعریف کوں بدلݨ دی لوڑھ اے خواندگی دی تعریف ایجھی ہووݨی چاہیدی اے جیں توں لوکاں دی زندگی اچ بہتری آوے ۔
.jpg)
