اسلام آباد۔8ستمبر (اے پی پی):اقوام متحدہ دے سیکرٹری جنرل انتونیو گوتریش شدید سیلاب توں متاثرہ پاکستان نال اظہار یکجہتی کیتے (کل) جمعے توں پاکستان دا ݙو ݙینھ دا دورہ کریسن ۔ دفتر خارجہ دے ترجمان آکھیے جو اقوام متحدہ دے سیکرٹری جنرل 9 توں 10 ستمبر تئیں پاکستان دا دورہ کریسن جیں دا مقصد پورے ملک اچ ودھ سارے مینھ وسݨ تے سیلاب دی وجہ توں تھیوݨ آلی تباہی تے قدرتی آفتاں دا مقابلہ کرݨ آلے پاکستان دی حکومت اتے عوام نال اظہار یکجہتی کرݨا اے۔ اقوام متحدہ دے سیکرٹری جنرل انتونیو گوتریس دورے دے دوران پاکستانی قیادت اتے اعلیٰ حکام نال ملاقاتاں کریسن جیں اچ او موسمیاتی تبدیلی توں تھیوݨ آلی تباہی دے قومی اتے عالمی ردعمل تے ڳالھ مہاڑ کریسن ۔ سیکرٹری جنرل موسمیاتی تباہی توں ساریں توں ودھ متاثر تھیوݨ آلے علقیں دا دورہ وی کریسن جتھاں او بے گھر خانداناں تے متاثرہ علاقیں اچ ابتدائی بچائواتے امدادی کارروائیاں کرݨ آلیں دے نال ڳالھ مہاڑ کریسن ۔ ترجمان موجب اقوام متحدہ دے سیکرٹری جنرل لکھاں متاثرہ لوکاں کیتے حکومت دی بچائو تے امدادی کوششاں دی حمایت اچ اقوام متحدہ دے انسانی امداد دے کم دی نگرانی کریسن ۔ اقوام متحدہ دے سیکرٹری جنرل انتونیو گوتریش دا دورہ پاکستان ایں قدرتی آفت دے نتیجے اچ تھیوݨ آلے جانی ضیان تے وݙے پیمانے تے تھیوݨ آلی تباہی بارے عالمی بیداری کوں مزید ودھارا ݙیسی ۔ اقوام متحدہ دے سیکرٹری جنرل دا اے دورہ 33 ملین متاثرہ پاکستانیاں دی انسانی اتے ٻیاں ضرورتاں کیتے ہم آہنگ اتے مربوط بین الاقوامی ردعمل کوں ودھاوݨ اچ معاون ثابت تھیسی ۔ اقوام متحدہ دے سیکرٹری جنرل پاکستان دے فلڈ ریسپانس پلان دی فنڈنگ کیتے 160 ملین امریکی ڈالر دی اقوام متحدہ دی “فلیش اپیل” کیتی 30 اگست کوں اسلام آباد اتے جنیوا اچ ھکے ویلھے تھیوݨ آلی لانچنگ تقریب اچ ھک طاقتور ویڈیو پیغام اچ فعال طور تے حمایت کیتی۔ اقوام متحدہ دے سیکرٹری جنرل مسلسل ایں طرح دی آفات کوں موسمیاتی تبدیلی دے اثرات نال منسلک کرݨ تے زور ݙیندے رہ ڳئن تے او عالمی برادری کوں خبردار کریندے رہن جو موسمیاتی تبدیلیاں کوں وختی تے موثر طریقے نال حل نہ کیتا ڳیا تاں ایں توں ساݙے سیارے سنگین خطرات لاحق تھیسن۔ اقوام متحدہ دے سیکرٹری جنرل دا دورہ پاکستان سیلاب توں متاثرہ علاقیں دی بحالی تے تعمیر نو دے مرحلے اتے مستقبل اچ موسمیاتی تبدیلیاں نال نبݨݨ کیتے پاکستان دی پائیدار بین الاقوامی حمایت دی اہمیت کوں وی اجاگر کریسی ۔
.jpg)
