اسلام آباد۔30ستمبر (اے پی پی) وزیراعظم محمد شہباز شریف آکھیا جو ٓڈیو لیکس عمران نیازی دے کوڑے بیانیے اتے اڄوکی حکومت دے خلاف زہریلے پروپیگنڈے کوں بے نقاب کر ݙتے، عوام خدمت اتے فراڈ دی سیاست اچ فرق کرن۔ عوام ہمیشہ صحیح فیصلہ کریندن۔ جمعے کوں بھارہ کہو بائی پاس منصوبے دا منڈھ بدھݨ دی تقریب توں خطاب کریندیں ہوئیں وزیراعظم آکھیا جو اے ہک عظیم عوامی منصوبہ اے جئیں کوں شفاف بولی دے تحت این ایل سی کوں ݙتا ڳئے، منصوبے کوں چار مہینے اچ پورا کرݨ دا معاہدہ تھیے پر این ایل سی حکام کوں آکھداں جو اینکوں ترائے مہینے اچ پورا کیتا ونجے۔ مسلم لیگ(ن) دی حکومت دی ہک نی، درجناں ایجھی مثالاں ہن جو ایجھے منصوبے ݙیڈھ اتے ݙو مہینے دے عرصے اچ پورے تھین اگر ایں منصوبے تے خرچ ڳھٹ تھی سڳدے تاں اوں تے وی کوشش کرݨی چاہیدی اے، ایں منصوبے نال آزاد کشمیر، جاڑے شہر اتے ملک توں سیاحت کیتے آئے لوکاں کوں سہولت تھیسی اتے ویلھے دی بچت تھیسی۔ وزیراعظم آکھیا جو جاڑے شہراں کیتے ٻئے منصوبے وی جاری ہن۔
انہاں اچ اینٹی گریٹڈ ٹرانسپورٹ دا منصوبہ وی شامل اے جئیں نال اسلام آباد دے مختلف سیکٹرز توں مسافراں کوں اربن ٹرانسپورٹ نظام نال جوڑیا ویسی۔ وزیراعظم آکھیا جو سابق وزیراعظم عمران نیازی ݙینھ رات ڈھٹائی نال کوڑ ماریے اتے غلط رواج قائم کیتے جو ودھ کوڑ مار تے لوکاں کوں ورغلایا ونڄے۔ سابق وزیراعظم بلاشبہ ورلڈ کپ جتیا اتے ہسپتال ٻݨایا پر اے ٹیم ورک دا نتیجہ ہئی، کپتان کوں اوندا کریڈٹ ویندے، ہسپتال ٻݨایا چنڳی ڳالھ اے پر کہیں کوں پرے پرے تئیں خیال کائنا ہئی جو ورلڈکپ جتݨ آلا اتے ہسپتال ٻݨاوݨ آلا سیاست دے میدان اچ کوڑ مریسی اتے قوم کوں دھوکہ ݙیسی۔ آڈیو لیکس بارے ڳالھ کریندیں ہوئیں انہاں آکھیا جو آڈیو لیکس نال کھیر دا کھیر اتے پاݨی دا پاݨی تھی ڳئے۔ پوری قوم ݙیکھ ڳھدے جو عمران خان کینویں کوڑ ماریے۔ وزیراعظم آکھیا جو انہاں قومی اسمبلی دے فلور تے اے بیان ݙتا ہئی جو اگر اے ثابت تھی ونڄے جو اساں غیر ملکی حکومت نال سازش کر تے حکومت ڳھدی تاں اساکوں سولی تے لٹکا ݙتا ونڄے۔ قوم دے پںج مہینے ضائع تھی ڳئن، پوری قوم کوں تقسیم کیتا ڳئے اتے اے زہریلا پروپیگنڈا کیتا ڳئے۔
وزیراعظم آکھیاجو شنگھائی تعاون تنظیم دے اجلاس اچ پوری دنیا دے قائدین نال انہاں دی ملاقاتاں تھین، انہاں قائدین اچ او لوک وی شامل ہن جنہاں دے عمران خان آپݨی تقریراں اچ حوالے ݙیندے ہن، اساݙی انہاں نال چنڳی ڳالھ تھئی اے اتے انہاں خود آکھیے جو اساں تساں کوں زرعی میدان اچ مدد کرݨ چاہندوں۔ انہاں قائدین پٹرولیم اتے گیس پائپ لائن دے منصوبیاں تے وی چنڳی ڳالھ کیتی۔ اوندے بعد اقوام متحدہ دی جنرل اسمبلی دے اجلاس دے موقع تے وی اساݙی ملاقاتاں تھین۔ وزیراعظم آکھیا جو اساݙی پوری کوشش اے جو پاکستان دی معیشت کوں پائیدار بنیاداں تے مضبوط کیتا ونجے، مہانگ ڳھٹ کیتی ونڄے۔ اساں ݙے تیل تے گیس کائنی، انہاں دی درآمد تے ارباں ڈالر خرچ تھیندے پئن۔ اساݙے ذرائع محدود ہن پر اساں پریشان اتے گھبراوݨ آلے کائنی۔ اساں ملک اتے معیشت کوں ایں اوکھ اچوں کݙھ ڳھنسوں۔ میݙا اے ایمان اے جو اگر اساں محنت کریسوں تاں اللہ اوندا صلہ ڈیسی۔ وزیراعظم آکھیا عمران نیازی آکھدے جو میں خیرات منگݨ ٻاہر وینداں کیا او خیرات ونڈݨ ویندے ہن۔ میکوں پتہ اے جو اے ہک دوست ملک ڳئے اتے منتاں ترلے کریندے رہیے جو تساں اساں کیتے قرضے دا اعلان کرو۔
وزیراعظم آکھیا جو او عوام توں ہتھ بدھ تے آکھدن جو او سچ تے کوڑ، خدمت تے فراڈ، ریاکاری اتے سچ اتے خدمت اتے جنڳھ تے جنڳھ رکھ تے ٻہݨ آلے دے طرز عمل اچ فرق کرن۔ سندھ دے تلویں علاوے، بلوچستان ، جنوبی پنجاب اتےخیبرپختونخوا اچ چھل پاروں ٻہوں ضیان تھیے۔ گزریل ݙو مہینے اچ عمران نیازی جلسے کرتے الزام لیندا پئے، انہاں جلسیاں تے کروڑ روپے لڳین، کاش اے پیسے ݙکھی انسانیت دی خدمت اتے متاثرین کیتے خیمے اتے امدادی سامان ڳھنݨ تے خرچ تھیندے۔ تقریب اچ وزیر داخلہ رانا ثنا اللہ، وزیراعظم دے معاون خصوصی طارق فاطمی، طارق فضل چوہدری، انجم عقیل ، زہرہ ودود فاطمہ اتے ٻئی شخصیات موجود ہن۔ ایں توں پہلے چیئرمین سی ڈی کپٹن(ر) عثمان تقریب توں خطاب کریندیں ہوئیں وزیراعظم اتے آوݨ آلے مزماناں دا خیرمقدم کیتا۔
