اسلام آباد۔10جولائی(اے پی پی) پنجاب اچ بلدیاتی انتخابات کراوݨ دے سارے انتظامات مکمل کر ڳھدن۔ اے ڳالھ چیف الیکشن کمشنر سکندر سلطان راجہ دی اڳواݨی اچ اسلام آباد اچ تھیوݨ آلے ہک اجلاس اچ آکھی ڳئی اے۔ بلدیاتی انتخابات بارے بریفنگ ݙیندے ݙسایا ڳئے جو پنجاب اچ بلدیاتی انتخابات دے ارے انتظامات مکمل تھی ڳن، الیکشن کمیشن اسلام آباد دے بلدیاتی انتخابات کراوݨ کیتے بالکل تیار اے اتے ایں سانڳے شیڈول وی ٻݨا ڳھدا ڳئے، ڄݙاں جو پنجاب اچ انتخابی گروپاں دی رجسٹریشن دا عمل 17جولائی تئیں مکمل تھی ویسی۔ الیکشن کمیشن دے اجلاس اچ چیف الیکشن کمشنر سکندر سلطان راجہ سودھا الیکشن کمیشن دے ممبران، اسپشل سیکرٹری اتے ٻئے اعلیٰ افسران شریک تھین۔ الیکشن کمیشن آکھیے جو پنجاب بلدیاتی انتخاب اچ ای وی ایم اتے آئی ووٹنگ دی سہولت نئیں ݙتی ونڄ سڳدی، صوبائی حکومت ایں سانڳے لوکل گورنمنٹ رولز 35 فور اچ ضروری ترمیم کرݙتی اے، الیکشن ایکٹ 2017 اچ ترمیم ضروری اے جو لوکل گورنمنٹ ایکٹ اتے رولز اچ تصادم نہ تھیوے۔ الیکشن کمیشن لوکل گورنمنٹ رولز 2022 اچ ضروری ترمیم کیتے پنجاب حکومت کوں خط لکھݨ دا وی آکھیے۔
