ماسکو۔30جنوری (اے پی پی) وزیر خارجہ بلاول بھٹو زرداری آکھیا جو پاکستان اتے روس دے تعلقا ت ݙوپاسہ اتے علاقائی استحکام کیتے اہم ہن، پاکستان روس دے تعلقات ٻہوں پراݨے ہن، روسی وزیرخارجہ دے نال سارے شعبیاں اچ دوستانہ ماحول اچ ڳالھ تھئی اے۔ تنازعیاں دا پر امن حل چاہندوں۔ اے ڳالھیں انہاں رود دے ݙو ݙینھ دے سرکاری دورے دے موقع تے سنوار کوں اپݨے روسی ہم منصب سرگئی لاروف نال ملاقات دے بعد سانجھی پریس کانفرنس کریندیں ہوعیں آکھی۔ بلاول بھٹو زرداری آکھیا جو اعلیٰ سطح دے مذاکرات کیتے دعوت تے روسی وزیرخارجہ دا شکریہ ادا کرینداں۔ انہاں آکھیا جو پاکستان اتے روس وچال اٹھواں بین الحکومتی اجلاس کامیابی نال تھیے، پرتپاک استقبال تے روسی وزیرخارجہ دا شکریہ ادا کریندوں۔ بلاول بھٹو زرداری آکھیا جو پاکستان دی معیشت چھل پاروں ٻہوں متاثر تھئی اے۔ ایں موقع تے روسی وزیر خارجہ سرگئی لاروف آکھیا جو پاکستان نال ݙو پاسہ تعلقات کوں مضبوط کرݨ چاہندوں۔ افغانستان اچ امن کیتے پاکستان اتے روس اپݨی کوششاں جاری رکھیسن۔ پاکستان دی توانائی دی لوڑھ پوری کرݨ کیتے تعاون کریسوں۔ روسی وزیر خارجہ آکھیا جو پاکستان تے روس مختلف عالمی فورمز تے سانجھا موقف رکھیندن۔ پاکستان اتے روس دا شنگھائی تعاون تنظیم (ایس سی او) اچ تعاون بارے ہکو سواں موقف اے۔ سرگئی لاروف آکھیا جو افغانستان اچ امن کیتے ݙوہیں ملک اپݨی کوششاں کریندے رہسن۔
