ملتان۔1دسمبر(اے پی پی):وفاقی وزیرمواصلات مولانا اسعد محمود آکھیے جو ڈاک دی ڈیلیوری دے نظام اچ مزید بہتری اتے جدت گھن آوݨ کیتے پورے ملک دے پوسٹ میناں اچ موٹرسائیکلز ݙیندے پئن۔عوام کوں پوسٹ آفسز دیاں سہولتاں انہاں دے دروازے تے پڄاوݨ کیتے سابقہ دور حکومت اچ بند کیتے ڳئے 600 توں ودھ ڈاکخانیں کوں ول کھولݨ دا آغاز کرݙتے ۔محکمہ ڈاک دے نظام اچ جدت گھن آوݨ کیتے پورے ملک دے 150 توں ودھ پوسٹ آفسز کوں کمپیوٹرائزڈ کرݙتا ڳئے جݙاں جو دسمبر 2022ء تئیں ملک دے سارے ڈاکخانیں کوں ڈیجیٹلائزڈ کرݙتا ویسی ۔ اے ڳالھ وفاقی وزیرمواصلات ملتان جنرل پوسٹ آفس اچ منعقدہ پوسٹ مین سٹاف کوں مالکانہ حقوق تے موٹرسائیکل تقسیم کرݨ دی تقریب توں خطاب کریندے ہوئیں آکھی اے ۔ ایں موقع تے ڈائریکٹر جنرل پاکستان پوسٹ رانا حسن اختر اتے پوسٹ ماسٹر جنرل جنوبی پنجاب سرکل ذوالفقار حسنین وی موجود ہن ۔مولانا اسعد محمود مزید آکھیے جو عوامی سہولتاں ݙیوݨ دے پیش نظرجنوبی پنجاب اچ 600 توں ودھ ڈیجیٹل فرنچائزپوسٹ آفسز دا آغاز کیتا ڳئے جنہاں توں عوام اپݨی دہلیز تے پوسٹ آفسز دیاں سہولتاں توں فیدہ چیندے پئن ۔
