اسلام آباد۔18جنوری (اے پی پی):الیکشن کمیشن قومی اسمبلی دے 48، پنجاب اسمبلی دے 52 اراکین سودھے 154 اراکین ولوں آپݨے تے آپݨے زیر کفالت لوکاں دے اثاثہ جات دے سالانہ گوشوارے جمع نہ کراوݨ دی بنیاد تے رکنیت معطل کرݙتی اے۔ اراکان ولوں گوشوارے جمع کراوݨ تئیں او ایوان دی کارروائی یا قائمہ کمیٹیاں دے اجلاساں دی کارروائی اچ حصہ نہ گھن سڳسن ۔الیکشن کمیشن ولوں جاری تفصیلات موجب قومی و صو بائی اسمبلیاں اتے سینٹ دے سارے ارکان کیتے انتخابی قانون 2017 دے تحت لازم اے جو او ہر سال دے چھیکڑ تے 31 دسمبر تئیں اپݨے اتے اپݨے زیر کفالت لوکاں دے اثاثہ جات دے سالانہ گوشوارے جمع کراون۔ 15 جنوری دے بعد ایجھے ارکان کوں متعلقہ اسمبلیاں اتے انہاں دیاں قائمہ کمیٹیاں دے اجلاس دی کارروائی اچ شرکت توں روک ݙتا ویندے ۔ الیکشن کمیشن دے مطابق سینٹ دے ترائے ارکان مصدق مسعود ملک، کامران مائیکل، شمیم آفریدی ولوں اثاثہ جات دے گوشوارے جمع نہ کراوݨ تے انہاں دی رکنیت معطل کیتی ڳی اے ۔ قومی اسمبلی دے 48ارکان کوں کم توں روک ݙتا ڳے انہاں اچ وفاقی وزرا فواد احمد، ڈاکٹر فہمیدہ مرزا، سید علی حیدر زیدی شامل ہن۔ ٻئے ارکان اچ مجاہد علی، فضل محمد خان، ناصر خان، شاہد احمد، محسن جاوید، عبدالشکور، علی نواز اعوان، مہناز اکبر عزیز، چوہدری شوکت علی بھٹی، نواب شیر وسیر، محمد ریاض، روحیل اصغر، سعد وسیم، محمد معین وٹو، چوہدری محمد اشرف، عبدالرحمن کانجو، عالم داد لالیکا، نورالحسن تنویر، میاں نجیب الدین اویسی، مخدوم سید سمیع الحسن گیلانی، جاوید اقبال، محمد شبیر علی، مخدوم زادہ سید باسط سلطان، سردار محمد خان لغاری، عابد حسین، محمد اکرم، عامر حسین، عطا اللہ، محمد اسلم خان، خالد مقبول صدیقی، محمدا سرار ترین، میر خان محمد جمالی، عصمت اللہ، شازہ فاطمہ خواجہ، کرن عمران ڈار، شہناز سلیم ملک، مائزہ حمید، فوزیہ بہرام، شمیم آرا، نورین فاروق خان، شاندانہ گلزار، منورہ بی بی، جے پرکاش، جمشید تھامس اتے جیمز اقبال شامل ہن۔ پنجاب اسمبلی دے ارکان اچ چوہدری نثارعلی خان، ملک محمد احمد خان، محمد یار ہراج، سردار اویس احمد خان لغاری سودھے 52 ارکان شامل ہن۔ سندھ اسمبلی دے 19، خیبرپختونخوا اسمبلی دے 26 اتے بلوچستان اسمبلی دے 6 اراکین ولوں گوشوارے جمع نہ کراوݨ تے انہاں دی رکنیت معطل کیتی ڳئی اے ۔
