اسلام آباد۔14مئی(اے پی پی):وزیراعظم دے معاون خصوصی عطا تارڑ آکھیے القادر ٹرسٹ کیس کرپشن دا ساریں توں وݙا سکینڈل اے، بلیک منی کوں وائٹ کرݨ کیتے کوڑا ٹرسٹ بݨایا ڳیا، عمران خان دی کرپشن تے چوری وٹھی ڳئی انہاں قومی خزانے کوں ارباں دا ضیان پڄائے ، عمران خان کوں آُݨی لٹ مار دا حساب ݙیوݨا پوسی ،عمران خان سیاسی مخالفین تے لاتے ڳئے الزامات کوں ثابت نہ کرسڳیے، عمران خان دی ہدایت تے شرپسنداں املاک کوں جیڑھا ضیان پڄائے انہاں شرپسنداں تے دہشت گردی دے مقدمات درج کیتے ویسن ۔اتوار کوں اتھاں پریس کانفرنس توں خطاب کریندے ہوئیں انہاں آکھیے عمران خان غیرقانونی رہائی دے بعد خطاب کیتا۔ انہاں 60 ارب روپے دی چوری دے معاملے کوں ایویں پیش کیتے او پاکستان دے مفاد اچ ہئی ، ایں بندے دا بیان نی لڳدا جو جیں دا ذہنی توازن درست ہووے۔ انہاں آکھیے نیب ھک ایجھے کیس اچ عمران خان دی گرفتاری عمل اچ گھن آئے جیں اچ رشوت براہ راست وٹھی ڳئی ہئی ۔ کابینہ اچ ھک بند لفافہ گھن آیا ڳیا جیں تے اوں ویلھے دے وزیر طارق بشیر چیمہ تے فیصل واوڈا اعتراض کیتا جو ایں لفافے کوں کھولیا ونڄےایندے اچ کیا ہے تے کابینہ توں کیڑھی شئے دی منظوری ڳھدی ویندی پئی اے بجائے ایندے جو 60 ارب روپے قومی خزانہ اچ جمع کرویندے جیڑھا قوم دا پیسہ ہئی خان صاحب ایں کیتے اپݨی دکان کھولی اتے منی لانڈرنگ کرݨ آلیں کوں او سہولتاں ݙتیاں جیڑھیاں پاکستان دی تاریخ اچ کہیں کوں نہ ملیاں ۔ انہاں 190 ملین پائونڈ ملݨ دے بعد پراپرٹی ٹائیکون دے جرمانہ دی مد اچ سپریم کورٹ اچ جمع کرائےاتے ایندے بدلے 458 کنال زمین ڳھدی۔
