اسلام آباد۔18دسمبر(اے پی پی) نگران وفاقی وزیر تعلیم و پیشہ وارانہ تربیت سید مدد علی سندھی آکھیے جو عربی زبان مسلماناں دا عظیم اثاثہ اے، عربی زبان دی خدمت وی عبادت اے، ترقی دا واحد حل تعلیم کوں ترجیح ݙیوݨ وچ اے۔ اے ڳالھ انہاں بین الاقوامی اسلامی یونیورسٹی دے اہتمام نال “عربی زبان دے ودھارے اچ اداریں اتے لوکاں دا کردار “دے موضوع تے کانفرنس توں خطاب کریندے ہوئیں آکھی اے ۔ انہاں آکھیے عربی فصاحت آلی زبان اے جیڑھی جو وہندا دریا اے جیں دی روانی ہر لنگھدے ݙینھ نال ودھدی پئی اے ۔ وفاقی وزیر تعلیم آکھیے عربی دے ودھارے اچ بین الاقوامی اسلامی یونیورسٹی دا کردار مثالی اے جتھاں مصر، سوڈان، سعودی عرب سودھے ٻئے کئی ملکاں دے استاد بہترین کردار نبھیندے پئن ۔ انہاں آکھیے جو بین الاقوامی اسلامی یونیورسٹی جیہے اداریں کوں معاشرے اچ ودھاوݨا ہوسی تے جامعہ دی طرزتعلیم کوں باقی جامعات وی اپناون ۔کانفرنس نال یمن دے سفیر محمد مطہر العشبی خطاب کریندے ہوئیں آکھیے عربی قرآن دی زبان اے، اساں نماز تئیں عربی اچ پڑھدوں ، عربی دے ودھارے سانڳے اقدامات کیتے ونڄن ۔ قائمقام صدر جامعہ ڈاکٹر عبدالرحمن آکھیے جو معاشی اتے علمی ترقی اچ عربی زبان دا کردار اہم اے۔انہاں آکھیے قرآن فہمی تے عربی دے ودھارے اچ تعلیمی ادارے بہترین کردار ادا کرسڳدن ۔
