اسلام آباد۔17ستمبر (اے پی پی) وزیراعظم محمد شہباز شریف پاکستان ٹیلی ویژن اچ بݨائے ڳئے انگریزی چینل ’’پاکستان ٹی وی ڈیجیٹل ‘‘ دا افتتاح کر ݙتا۔ بدھ کوں وزیراعظم پاکستان ٹی وی ڈیجیٹل دا دورہ کیتا جتھاں انہاں پاکستان ٹی وی ڈیجیٹل دے قیام دی تختی دی نقاب کشائی کیتی اتے ڈیجیٹل چینل دی باقاعدہ نشریات دا افتتاح وی کیتا۔ ایں موقع تے وفاقی وزیر اطلاعات تے نشریات عطاء اللہ تارڑ اتے وفاقی سیکرٹری اطلاعات تے نشریات عنبرین جان سمیت ٻئے اعلیٰ حکام وی موجود ہن۔ پی ایم آفس دے میڈیا ونگ ولوں جاری بیان دے مطابق وزیراعظم نویں بݨائے ڳئے ٹی وی چینل دے مختلف سیکشناں دا دورہ کیتا اتے اوتھاں کم کرݨ آلے نینگراں نال ڳالھ کیتی۔ وزیراعظم انہاں دے جذبے دی تعریف کریندیں ہوئیں آکھیا جو ٻاہرلے بیانیے دی جنگ اچ انہاں دا کردار بہوں اہم اے۔ انہاں آکھیا جو ڈیجیٹل چینل دے آغاز دا اصل مقصد مسلسل سچی خبراں ݙیݨدے ہوئیں پاکستان بارے تھیوݨ آلی غلط ڳالھ اتے پراپیگنڈے دا موثر جواب ݙیوݨے۔ وزیراعظم پاکستان ٹی وی ڈیجیٹل دی نشریات کیتے آپݨا پہلا انٹرویو وی ریکارڈ کرایا۔ ایں موقع تے وفاقی وزیر اطلاعات تے نشریات عطااللہ تارڑ وزیراعظم کوں پاکستان ٹی وی ڈیجیٹل دے مقصد بارے ݙسایا۔ انہاں ݙسایا جو پاکستان ٹی وی ڈیجیٹل عالمی ناظرین کوں پاکستان کیتے ہک فعال اتے سچی آواز ݙیوݨ، معلومات دے تضاد کوں مکاوݨ اتے عوامی سفارت کاری کیتے انگریزی زبان دے ہک پلیٹ فارم دے طور تے کم کریسی۔ ایں پلیٹ فارم دا خاص مقصد پاکستان ولوں دنیا نال ڳالھ کرݨا اتے سب توں پہلے آپݨی خبر ݙیوݨ اے، اے چینل بین الاقوامی معاملے، ثقافتی تنوع اتے اقتصادی ترقی سودھے اہم معاملیاں تے پاکستانی نقطہ نظر کوں اجاگر کریسی۔ انہاں آکھیا جو اے چینل ملک دے اندر دی رپورٹنگ کوں سانجھا کریسی اتے فری لانسرز دے عالمی نیٹ ورک اتے رائٹرز اتے ایسوسی ایٹڈ پریس جہی مشہور وائر سروسز نال سانجھ داری کریندیں ہوئیں ویلھے تے، تصدیق شدہ اتے اعلیٰ معیار دی کوریج کوں یقینی بݨیسی۔ انہاں آکھیا جو لہندے اتے بھارت دے اثر ہیٹھ علاقائی میڈیا اچ جاری ہک پاسے دے بیانیے دا تروڑ کیتا ویسی۔ وزیر اطلاعات آکھیا جو پاکستان ڈیجیٹل ٹی وی پاکستانی نقطہ نظر توں خبراں ݙیوݨ دے حوالے نال ہک وݙا مرکز اے۔
