اسلام آباد۔9اکتوبر(اے پی پی)وفاقی وزیر اطلاعات و نشریات عطاء اللہ تارڑ آکھیے جو جیل اچ ٻیٹھے شخص دے دور اچ دہشت گرداں کوں واپس گھن آتے ملک کوں ٻہوں ضیان پڄایا ڳیا، تحریک انصاف دا انتشار پسند ٹولہ دہشت گرداں دا سہولت کار اے، نہتے شہریاں تے حملہ کرݨ آلے اتے مسیتاں، سکولاں کوں نشانہ بݨاوݨ آلے کہیں رعایت دے مستحق کائںی، ملک اچ عدم استحکام پیدا کرݨ آلے عناصر کوں کامیاب نہ تھیوݨ ݙیسوں، علی امین گنڈا پور کوں دہشت گرداں دی مکمل سہولت کاری نہ کرݨ تے ہٹایا ڳیا۔ اتھاں وزیراعظم دے کوآرڈینیٹر اطلاعات و امور خیبر پختونخوا اختیار ولی خان دے نال میڈیا نال ڳالھ مہاڑ کریندے وفاقی وزیر اطلاعات عطاء اللہ تارڑ آکھیا جو وزیراعظم شہباز شریف اتے فیلڈ مارشل سید عاصم منیر شہداء دے جنازیں اچ شریک تھئے، اورکزئی اچ شہید تھیوݨ آلے کرنل جنید، میجر طیب، دیرہ اسماعیل خان اچ شہید تھیوݨ آلے میجر سبطین اتے انہاں دے جواناں دیاں قربانیاں کوں سنہری اکھراں نال لِکھیا ویسی۔ انہاں مادر وطن تے جان قربان کر ݙتی اتے انہاں دے خاندان ماݨ دا اظہار کریندے پئن اتے اے جذبات ظاہر کریندے پئن جو اساݙے نکے ٻالاں ملک تے جان نچھاور کیتی اے، اساں کوں ایں ڳالھ تے ماݨ اے جو شہادت انہاں دے نصیب اچ آئی۔وفاقی وزیر آکھیا جو جݙاں تئیں ایہو جیھے بہادر جوان ایں دھرتی تے جان نچھاور کرݨ آلے موجود ہن مملکت خداداد کوں انشاء اللہ ضیان نی پڄ سڳدا، اے او ہستیاں ہن جنہاں دے نِکے ٻال یتیم تھی ویندن اتے اے بہادر افسر اتے جوان ملک دی خاطر شہید تھینن تاں جو اساں آپݨے گھراں اچ آرام دی نندر سم سڳوں اتے اساݙے خاندان محفوظ رہ سڳن۔ جݙاں کہیں بیوہ توں یا کہیں شہید دی ماء اتے پیو نال ڳالھ تھیندی اے تاں انہاں دے اطمینان دا اظہار ݙیکھݨ دے قابل ہوندے اتے او شہادت تے اللہ تعالیٰ دا شکر ادا کریندن۔ انہاں ݙسایا جو گزریل ݙینھ میجرعدنان آپݨے ساتھی کوں بچیندے عظیم قربانی ݙتی۔ اے او کہانیاں ہن جیڑھیاں ہمیشہ تئیں زندہ رہسن۔وفاقی وزیر آکھیا جو ایں ملک اچ ہک انتشاری ٹولہ موجود اے جیڑھا ملک دے امن امان کوں تباہ کرݨ چاہندے، جنہاں دا ماضی وی ایہو اے جݙاں انہاں دی حکومت ہائی تاں انہاں نیشنل ایکشن پلان کوں ختم کر ݙتا ہئی۔ وفاقی وزیر آکھیا جو آپریشن ضرب عضب اتے آپریشن رد الفساد اچ اساکوں کامیابیاں حاصل تھیاں، دہشت گرداں کوں پچھوں ہٹݨ تے مجبور کیتا اتے اللہ تعالیٰ ایں ملک دے اندر امن قائم کیتا۔ انہاں آکھیا جو جیل اچ ٻیٹھے ہوئے ہک شخص اتے ایں دی جماعت آپݨے دور حکومت دے دوران انہاں دہشت گرداں کوں واپس گھن آ تے آباد کیتا اتے اڄ تئیں انہاں دی سہولت کاری جاری اے، تحریک انصاف دا پورا انتشار پسند ٹولہ دہشت گرداں دا سہولت کار وی اے۔انہاں آکھیا جو بانی چیئرمین پی ٹی آئی آپݨے پُراݨے انٹرویوز اچ آکھ چُکن جو اے وݙے چنڳے لوک ہن، انہاں نال ڳالھ مہاڑ کرݨی چاہیدی اے انہاں کوں واپس گھن آتے آباد کرݨا چاہیدے اتے ݙوجھے پاسے اے عناصر بازاراں، مسیتاں اتے تجارتی مراکز اچ دھماکے کریندن، سکولاں تئیں کوں وی نی بخشیندے اتے بے گناہ انساناں دی جان گھندن۔ وفاقی وزیر عطاء اللہ تارڑ آکھیا جو ریاست پاکستان 27 رمضان دی رات معرض وجود اچ آئی، اے کلمے دے ناں تے قائم تھیوݨ آلی ریاست اے اے انشاء اللہ ہمیشہ تئیں قائم رہسی۔ مُٹھی بھر دہشت گرداں کوں سہولت کاری جیل اچ ٻیٹھے ہوئے اوں شخص توں مِلدی اے جو دہشت گرداں دا چیف سپانسر اے اوں پہلے وی آپݨی حکومت دے دوران دہشت گرداں کوں واپس گھن آ تے سیٹل ایریاز دے اندر وسایا، انہاں دی باحفاظت واپسی اتے انہاں کوں رہݨ سہݨ دی جاہ ݙتی اتے اڄ وی کے پی کے دی سیاست ایں چیز دے آسے پاسے گھمدی پئی اے۔انہاں آکھیا جو سہیل آفریدی کوں خیبر پختونخوا دا وزیراعلیٰ نامزد کیتا ڳئے، بانی چیئرمین کوں علی امین گنڈا پور نال رنجش اے ہائی جو او دہشت گرداں دی سہولت کاری نہ کریندے پئے ہن، انہاں کوں آکھیا ڳیا ہئی جو توں دہشت گرداں دی سہولت کاری کر اتے انہاں دے خلاف کارروائیاں بند کر، شاید علی امین گنڈا پور ایں حد تئیں اے مشن پورا نی کر سڳیا ہݨ بانی چیئرمین ہک ایہو جیھے بندے کوں سامݨے گھن آئے جو ہک اشتہاری اتے بھڳوڑے مراد سعید دا نیڑے دا ساتھی اے اتے دہشت گرداں دے حوالے نال وی نرم گوشہ رکھیندے ۔ سہیل آفریدی کوں ایں کیتے گھن آیا ڳئے جو سہولت کاراں کوں مکمل طور تے سپورٹ کیتا ونڄے اتے انہاں کوں کُھلی چُھٹ ݙتی ونڄے۔وفاقی وزیر آکھیا جو پاکستان دی سکیورٹی پالیسی الحمد اللہ اسلام آباد اچ بݨدی اے اتے بݨدی رہسی، تحریک انصاف چاہندی اے جو سکیورٹی پالیسی کابل اچ بݨے ایں دی قطعی اجازت کائںی۔ انہاں آکھیا جو انہاں ملک دا ٻہوں ضیان کیتے، انہاں دہشت گرداں کوں اتھاں گھن آتے وسایا اتے اڄ وی انہاں دی سہولت کاری جاری رکھی ہوئی اے، گزریل 12 سالاں توں خیبر پختونخوا اچ پی ٹی آئی دی حکومت اے اتے اُتھاں دہشت گردی عروج تے رہی۔ انہاں آکھیا جو پاک فوج دے جوان افسر دہشت گرداں اتے عوام دے وچال سیسہ پلائی دیوار بݨے ہوئن، پاک فوج دیاں قربانیاں دے نتیجے اچ دہشت گردی دا تدارک کیتا ویندا پئے۔عطاء اللہ تارڑ آکھیا جو جیل اچ ٻیٹھا بانی چیئرمین پی ٹی آئی دہشت گرداں دا چیف سپانسر اے، انتشاری ٹولہ ایں ملک کوں ضیان پڄاوݨ چاہندے۔ دہشت گرد کݙاہیں وی غلبہ حاصل نہ کرسڳسن۔ انہاں آکھیا جو اے انتشار پسند لوک سہیل آفریدی دے ذریعے سہولت کاری، گھراں اچ انہاں کوں پناہ اتے سہولتاں ݙیوݨ چاہندن، سہیل آفریدی تے مقدمے اتنے ہن جو او ہک کرمنل مائنڈڈ آدمی اے۔ انہاں آکھیا جو افواج پاکستان دیاں قربانیاں کوں سنہری اکھراں اچ لِکھیا ویسی۔ اساں آپݨے شہیداں کوں سلام پیش کریندوں ، او اڄ وی دہشت گرداں کوں آپݨے خراب مقصد اچ کامیاب نی تھیوݨ ݙیندے پئے اتے آپݨے خون نال اے تاریخ لِکھدے پئن، اے قربانیاں دی لازوال داستان اے۔وفاقی وزیر اطلاعات آکھیا جو اڄ لندن دی ہک عدالت آپݨے فیصلے اچ انتشار پسنداں دے مُنہ تے ہک زوردی چماٹ ماری اے، اے پاکستان دے بیانیے اتے ریاست پاکستان دی جت اے اتے ایں نال پاکستان دی عزت و وقار اچ ودھارا تھئے۔ انہاں آکھیا جو تحریک انصاف دے حواری اتے شر پسند عناصر جتھاں وی موجود ہن ذلت اتے رسوائی انہاں دا مقدر بݨدی پئی اے۔ تحریک انصاف دا ایجنڈا بین الاقوامی سطح تے کورٹس دے اندر وی پِٹ ڳئے اتے انہاں کوں شدید رسوائی دا سامݨا کرݨا پئے جو لوک پاکستان دے اداریں، فوج اتے ریاستی اداریں تے کیچڑ سٹیندن، کوڑے بیانات ݙیندن اتے الزام تراشی کریندن او سارا بیانیہ دفن تھی ڳئے۔ انہاں آکھیا جو ہݨ کوئی جواز نی بچیا جو ٻاہرلے ملک ٻہہ تے کوئی پاکستان دی ریاست تے حملہ کرے اتے ایں دے خلاف ڳالھ کرے۔ اے انتشاری ٹولے دی شکست اے اتے انشاء اللہ انہاں کوں ہر میدان اچ شکست تھیسی۔ انہاں آکھیا جو اے بیانیہ دی جنگ ہردے پئن۔ انہاں آکھیا جو دہشت گرداں دی سہولت کاری اچ وی انہاں کوں ناکامی تھیسی انہاں کوں پچھوں ہٹݨا پوسی، ہݨ کئیں مُنہ نال دنیا دے مختلف چنڈ اچ ٻیٹھے انتشار پسند، ریاست پاکستان دے خلاف یا فوج دے خلاف ڳالھ کریسن؟ انہاں کوں آپݨے کیتے دی سزا بھوڳݨی پوسی۔ انہاں آکھیا جو پاکستان دے خلاف جنگ لڑدے پئن اتے پاکستان کوں ضیان پڄاوݨ چاہندن انہاں کوں مُنہ دی کھاوݨی پوسی۔
