اسلام آباد۔17ستمبر(اے پی پی) وفاقی وزیر تعلیم و پیشہ ورانہ تربیت ڈاکٹر خالد مقبول صدیقی آکھیے حکومت پاکستان نینگراں کوں عالمی معیار دیاں مہارتاں نال لیس کرݨ دے عزم تے کاربند اے تاں جو او نہ صرف ملکی ترقی اچ بھرپور کردار ادا کرسڳن بلکہ بین الاقوامی موقع توں وی فیدہ چا سڳن۔اے ڳالھ انہاں لینگوئجز ٹریننگ پروگرام دی کامیاب تکمیل دے موقع تے اظہارِ خیال کریندے آکھی ۔ ایں پروگرام دے تحت اسلام آباد دے 800 توں ودھ طلبہ بین الاقوامی زباناں ’’چینی، جرمن، عربی، جاپانی اتے کوریائی ‘‘ اچ مہارت حاصل کیتی، جنھاں اچوں سینکڑاں طلبہ چھی مہینے دی جامع اتے سخت تربیت مکمل کیتی۔ڈاکٹر خالد مقبول صدیقی ایں پروگرام کوں ’’پاکستان دے نینگراں توں کیتا ڳیا ھک وعدہ‘‘ قرار ݙیندے آکھیے اساں آپݨے نینگراں کوں او سارے اوزار ݙیسن جیڑھے انہاں ھک روشن مستقبل، معیاری ملازمتاں اتے عالمی سطح تے کامیابی حاصل کرݨ سانڳے درکار ہن۔انہاں آکھیا حکومت دا وژن صرف الفاظ تئیں محدود کائنی بلکہ عملی اقدامات دی صورت اچ واضح تھی چکئے۔ لینگوئجز ٹریننگ پروگرام نیوٹیک، نمل اتے وفاقی نظامت تعلیمات دے اشتراک توں کامیابی نال شروع کیتا ڳئے تے اے مستقبل دے تعلیمی اتے ہنرمندی دے منصوبیں سانڳے ھک مضبوط ماڈل ثابت ہوسی۔وفاقی وزیر پروگرام اچ شامل استاداں، ماہرین اتے طلبہ دیاں کوششاں دی تعریف کیتی تے انہاں دی محنت، لگن اتے کامیابیاں ایں بات دی دلیل ہن جو پاکستان دا مستقبل محفوظ ہتھاں اچ اے۔ انہاں مزید آکھیے جو اے کامیابی ھک نویں، باصلاحیت اتے عالمی دنیا نال جڑئے ہوئے پاکستان دی علامت اے۔وزیرِ تعلیم ایں موقع تے یقین ݙیوائے حکومت تعلیم، تربیت اتے ٹیکنالوجی دے میدان اچ مزید اقدامات کریسی تاں جو ہر نینگر کوں اپݨی مکمل صلاحیت دے اظہار دا موقع ملے۔
